الثوره الفرنسيه

نُط على: استكشاف، تدوير

   

اقتحام سجن الباستيل فى يوم 14 يوليو 1789

الثوره الفرنسيه ( 1789–1799 ) انقلاب سياسى و ثوره شعبيه بدأت فى فرنسا سنة 1789 و كان له اثر كبير على العالم كله , كمان بتعتبر اول ثورة ليبراليه فى التاريخ. المؤرخين مش متفقين عن سبب قيامها, فيه مؤرخين بيقولوا انها كانت حركه عقليه نشإت عن حركة التنوير فى القرن 18, و فيه مؤرخين بيقولوا انها كانت ثوره على الطغيان الاقطاعى و الظلم و الفساد و انتشار افكار التنوير.الثوره الفرنسيه مع انجازتها الكتيره للفرنساويين و للعالم كله, بتعتبر من اكتر الثورات دمويه فى التاريخ و اطولهم. مصطلح الثوره الفرنسيه غالبا بيتقال على الثوره اللى حصلت فى فرنسا فى سنة 1789 لحد 1799 , مع ان المصطلح دا ممكن يتقال على كذا ثوره حصلت فى فرنسا فى القرن التسعتاشر.

المحتويات 1 الظروف قبل الثوره 2 التنوير 3 الخط الزمنى للثوره الفرنسيه 4 الثوره 5 مراحل الثوره 6 نتايج الثوره 7 شوف كمان

الظروف قبل الثوره

رسمه بتوضح ظروف المجتمع قبل الثوره, النبلا و رجال الدين مرتاحين و عامه الشعب هما اللى شايلين مسؤلية كل حاجه فى البلد

• المجتمع الفرنساوى كان متقسم على شكل هرم طبقى, اوله الملك و النبلا و رجال الدين و تحتيه الطبقه التالته اللى بتتكون من الطبقه البورجوازيه المثقفه و اللى محرومه من المشاركه السياسيه و فى الاخر بقى الفلاحين و العمال و بقيه الشعب. طبقة النبلا الاريستقراطيين و رجال الدين كان عندهم حقوق زياده عن بقيه الناس و مش بيدفعوا ضرايب و ليهم نفوذ جامد و ممكن يفلتوا من عقوبه القانون.
• فرنسا كانت فى حالة افلاس كانت بسبب الفساد و ان المحاصيل الزراعيه كانت قليله و اتخرب اكتر بسبب تدخل الملك لويس الستاشر فى الاقتصاد بقرارته الغلط. اللى زود الموضوع اكتر هو نقص الدقيق و العيش فى فرنسا, ودا كان معناه كارثه للشعب كله, و طلعت اشاعات ان الدقيق بيتهرب و بيتباع بره. كمان الملك لويس الستاشر كان بعت 200 مليون ليفر (عمله فرنسا وقتها) عشان يساعد الاميركان فى ثورتهم ضد الانجليز اعدائه, فى نفس الوقت اللى بلده تقريبا كانت مفلسه و الناس مش لاقيه تأكل عيش. وبسبب الازمه الاقتصاديه دى الناس مكانتش لاقيه عيش وبقى تمن العيش يوزاى مرتب الشهر كله و حصلت اعتصامات واضرابات و زادت البطاله فى البلد.
• نظام الحكم كان مسيطر عليه الملك و النبلا و رجال الدين, اللى بيتدخلوا فى كل صغيره و كبيره و مكانوش بيتحاسبوا لو غلطوا, و طبقه مثقفيين اللى مكانوش بيئثروا فى الحكم و كان ليهم جزء صغير فى البرلمان الفرنساوى اللى اغلبيته من النبلا و رجالة الملك, اللى كانوا بيوقفوا اى قرار او قانون اصلاح او بيحدد سلطه النبلا و بيساوى بينهم و بين بقيه الناس.

التنوير

فلاسفه عصر التنوير و المفكريين اثروا جامد فى المجتمع الفرنساوى و اوروبا كلها. التنويريين طالبوا بحقوق الناس و حريتهم و المساواه, اللى مكانتش موجوده فى فرنسا وقتها. مفكريين و فلاسفه فرانسويين الهموا الثوار و زعمائهم زى فولتير, اللى انتقد الظلم الطبقى و سيطره رجال الدين على عقول الناس وتدخلهم فى كل صغيره و كبيره فى المجتمع والسياسه, و مونتيسكيو, اللى طالب بفصل السلطات و الليبراليه, و جان جاك روسو اللى طالب بالحريه و المساوه. كل الافكار دى الهمت و شجعت الناس انها تعرف ان ليها حقوق و لازم تقرر مصيرها بنفسها و تفكر و تشغل عقلها عشان تعرف الحقيقه و حالك دا كويس ولا لا؟..ولو مش كويس ازاى تغيره.الظلم و الفساد و الجهل اللى كانت فيه فرنسا وقتها و معرفه الناس حقوقهم شجعت على الثوره.

الخط الزمنى للثوره الفرنسيه

تسلسل الاحداث بالتفصيل اللى اتسببت فى قيام الثوره و ترتيب احداث الثوره بالتفصيل.

الثوره

تشكيل الجمعيه الوطنيه و ثورتهم على النظام.لوحة للفنان جاك لوى دافيد

بسبب الظروف الاقتصاديه الصعبه اللى اتسبب فيها الملك لويس الستاشر و اللى معاه حصلت اعتصامات واضرابات و مظاهرات. بسبب الازمات دى كلها و غضب الناس عين جاك نيكر كوزير للماليه عشان يهدى الناس اللى كانت بتحب نيكر اللى كان مؤمن بافكار التنوير و اعلن اكتر من مره ان الحكومه شغلتها انها توفر العيش و تدى للناس حقوقها. النواب المنتخبين الاقليه اللى كانو بيعبروا عن اكتريه الشعب قدموا طلب بإصدار قانون يخلى النبلا ورجال الدين يدفعوا ضرايب زى الناس التانيه, الموضوع دا رفضه الملك و النبلا و اعضاء الاغلبيه المتعينين من الملك, و حاولوا انهم يسكتوا النواب الطبقه التالته, فاتحدى النواب الموضوع دا و اعلنوا نفسهم جمعيه وطنيه فى 20 يونيه 1789 وانهم الممثليين الحقيقين للشعب مش المجلس اللى بيتحكم فيه الارستقراطيين و الناس اللى الملك معينهم, و طالبوا ان النبلا و رجال الدين يدفعوا ضرايب زى الناس التانيه برضه و طالبوا بعمل دستور جديد. الناس نزلت فى مظاهرات بتئيد نواب الطبقه التالته و الجمعيه الوطنيه و اشتبكوا مع قوات الملك. فى وسط الظروف دى كلها الملك لويس الستاشر قرر انه يشيل جاك نيكر من منصبه, عشان متعاطف مع الناس و الجمعيه الوطنيه, القرار دا زود الغل.

فى يوم 14 يوليه 1789 بعد تالت ايام من طرد الملك ل جاك نيكر, اللى الناس بتحبه, و الظروف الاجتماعيه و السياسيه و الاقتصاديه الصعبه اللى فرنسا فيها خلت الناس تثور و عملوا مظاهرات و ضربوا فى قوات الملك و سقط سجن الباستيل فى باريس اللى كان سقوطه رمز لسقوط السلطه المطلقه و دبحوا حراس و مدير السجن وقطعوا راسهم وعلقوها على عصيان و مثلوا بالجثث, الجمعيه الوطنيه معترضتش على اللى حصل , اتهمت بعد كدا انها لما اعترضتش العنف زاد, . فى نفس اليوم رجع الملك لويس الستاشر من رحله صيد و هو مش مهتم ولا عارف ايه اللى بيحصل فى البلد, الناس و الجمعيه الوطنيه تقريبا سيطروا على فرنسا و بدئوا يكسروا سجن الباستيل بايدهم, كرمز ان عصر الظلم خلص.

الجمعيه الوطنيه اعلنت و وقعوا إعلان حقوق الإنسان والمواطن, اللى كان متأثر جامد بافكار التنوير و اعتبروه خطوه اولانيه فى طريق عمل دستور جديد لدوله مدنيه, و حولوا فرنسا لدوله ملكيه دستوريه واجبروا الملك انه يقسم السلطه مع الجمعيه الوطنيه, و اعلنوا فى 4 اغسطس لغى حقوق النبلا و رجال الدين الزياده عن بقيه الناس و انهم لازم يدفعوا ضرايب و يتعاملوا زى بقيه الناس. فى يوم 4 اكتوبر ظهرت اشاعات ان الملك و النبلا عملوا حفله و رموا علم الثوره و شتموا الثوره, و نشر الصحفى جان بول مارات الاخبار دى فى الجورنال بتاعه و هيج الناس عليهم. فى يوم 5 اكتوبر كانت فيه مظاهره للستات اللى كانوا بيحتجوا على ان مفيش عيش موجود ووصلت ليهم الاخبار اللى جان بول مارات نشرها عن الحفله اللى حصلت دى,اكتر المصادر بتقول انها كانت اشاعه, و راحوا واخدين بعضهم و راحوا على قصر فرساى و فضلوا هناك محتجين يوم كامل و زادت اعددهم جامد و بقوا خطر جامد على العيله المالكه, و كالعاده الملك لويس الستاشر كان متردد و اتئخر كتير فى الرد على المتظاهريين و بعد ساعات اعلن انه وقع إعلان حقوق الإنسان والمواطن وانه ادى للناس حقوقها رسمى, بس الكلام دا كان متأخر قوى, و اقتحمت مجموعه من الستات القصر و قتلوا الحراس و كانوا حيقتلوا الملكه مارى انطوانيت و بعدين اجبروا الاسره المالكه انهم يروحوا على باريس, وفعلا حصل الكلام دا و بقى مقر الجمعيه الوطنيه ( اللى بقى البرلمان) الرسمى فى باريس. فى سنة 1791 الجمعيه الوطنيه اللى سمت نفسها فى الفتره دى " الجمعيه التأسيسيه " عملت دستور قيد السلطه التنفذيه , و اتدخلت النمسا و بروسيا عشان يقضوا على الثوره, و فعلا بدئوا يقربوا على باريس, دا خلى الثوار يثوروا اكتر و بتشجيع جان بول مارات و متطرفيين ثوريين تانيين راحوا هاجموا السجون اللى فيها الامرا و الاريستقراطيين و رجال الدين المحبوسيين و اقتلوا فيهم, قتلوا تقريبا 1600 واحد فى كام يوم. قرر الملك لويس انه يهرب هو و عيلته من الثوار على النمسا, اللى عيلة مراته كانت بتحكم هناك, عشان يكون جيش يرجع بيه و يرجع مملكته او على احسن الفروض انه يعيش فى أمان, بس اتقبض عليهم على الحدود بين فرنسا و النمسا, و اتعلن رسمى خلع الملك عن العرش و تأسيس الجمهوريه الفرنسيه الاولى برياسة روبسبير. و ظهر شعار " الحريه و الاخوه و المساواه " (Liberté, égalité, fraternité).

فى سنة 1792 بدإت حروب الثوره الفرنسيه تكتر و مع الهزايم الاولانيه ظهرت اشاعات بمساعدة الملك لويس و مراته الملكه مارى انطوانيت للحلفا ضد فرنسا فاتعدموا بالمقصله سنة 1793 فى المكان اللى فيه دلوقتى ميدان الكونكورد اللى بتتوسطه المسله المصريه. و عملوا الجمهوريه الفرنسيه الاولانيه اللى فيها بقى روبسبير بيحكم وفيها حصل حكم الارهاب و الديكتاتوريه, و قبض الجاكوبين على المعتدلين الجيروندين و اعدموهم. و فى سنة 1794 اتقبض على روبسبير و اتعدم هو كمان بالمقصله و زاد فساد الحكومه فى عهد حكومة الاداره اللى حكمت ما بين 1795 و 1799 و انتهى الحكم الثورى بإنقلاب عمله نابوليون بونابارت سنة 1799 و انشأ حكومة القناصله فى الجمهوريه, و فى سنة 1803 عين نفسه قنصل مدى الحياه, و بعدين توج نفسه امبراطور سنة 1804 و اسس الامبراطوريه الفرنسيه الاولى.

مراحل الثوره

علم الجمهوريه الفرنسيه و الثوره الفرنسيه, الاحمر و الازرق بيرمز للون علم باريس والابيض اللى وسطيهم كان علم و شعار عيلة لويس الستاشر اللى بتقيد فرنسا

الثوره الفرنسيه فضلت عشر سنين وعدت فى تلت مراحل اساسيه:

• المرحلة الاولى: (يوليو 1789 - اغسطس 1792), فترة الملكيه الدستوريه, اتميزت الفتره دى بتدمير سجن الباستيل وعمل اول دستور وبيان حقوق الانسان والمواطن و تأسسيس الجمعيه الوطنيه و الغاء الحقوق اللى بيتولد بيها الامراء والارستقراطيين.
• المرحلة التانيه: (اغسطس 1792 - يوليو 1794), فترة بداية الجمهوريه الفرنسيه الاولى و النظام الجمهورى وتصاعد التيار الثورى المتشدد اللى وصل لإعدام ه الملك لويس الستاشر و تحويل فرنسا لنظام جمهورى متشدد. فى الفتره دى اتقبض على ناس كتيره اتعدموا وفيها كانت بدايه حكم الارهاب اللى عمله روبسبير
• المرحله التالته: (يوليو 1794 – نوفمبر 1799)كانت فتره قل فيها التواجد الثورى المتشدد بالتدريج و رجعت البورجوازيه المعتدله و فيها اتعمل دستور جديد و اتحالفو الثوار مع الجيش و خلصت على وصول نابوليون بونابارت للحكم.

نتايج الثوره

• نتايج سياسيه: تطبيق الليبراليه السياسيه و ظهور النظام الجمهورى بدل الحكم الملكى المطلق و حرية التعبير. الهمت ثورات كتيرا عبر التاريخ بعد كدا. بتعتبر من اول ثوره الناس تقوم بيها فى العصر الحديث ضد حكامهم
• نتايج اقتصاديه: القضاء على النظام القديم و وتحرير الاقتصاد من تحكم الدولة و شيل الحواجز الجمركية الداخلية وتطبيق ليبراليه الاقتصاديه
• نتايج الاجتماعيه: الغاء الحقوق الزياده اللى بيتولدوا بيها اللى بتبقى عند الامراء والارستقراطيين و رجال الدين. و مصادرة ممتلاكات الكنيسه الكاثوليكيه و مجانيه التعليم و اجبار كل واحد انه يتعلم و عمل عدالة اجتماعيه وتوحيد اللغة الفرنساوى و تأئثيرها الكبير فى حياة الفرنسويين و العالم لحد دلوقتى
•  
• المصدر
•  
• http://arz.wikipedia.org/wiki/%D8%A7%D9%84%D8%AB%D9%88%D8%B1%D9%87_%D8%A7%D9%84%D9%81%D8%B1%D9%86%D8%B3%D9%8A%D9%87